Gaztelu eta jauregiez ari garenean, gure irudimenak ipuinetako tokietara egiten du hegan, urrutikoak, printze eta printzesak dauzkatenak…, baina guk, Zuiako Koadrilan leku hauek duela 800 urte baino gehiago benetan nolakoak ziren irudikatuko dugu. Horretarako Zuiako eta batez ere, Zigoitiko udalerrietara joango gara.
Bisita gidatua Gopegin hasi ohi dugu, bertan Gorbeia ingurura dagoen ikuspegi zoragarria baliatuz, balkoi bat dela esan dezakegu, mendi honen inguruan dauden kondaira ezberdinei buruz hitz egingo dugu, izenaren ingurukoak, bertako altxorraren ingurukoa,… Flora eta faunaren pintzelada txiki baten ostean bertako kobazulo baten berri ere emango dugu. Behin natura eta kondairekin amaituta gauden lekuan kokatuko gara. Erdi Aroko historiari buruz eta zubiaren goiko aldea eta beheko aldeari buruz hitz egin ostean dorreen tipologiak azalduko dira. Ondoren Goikolea edo Goikoetxea dorreari buruz hitz egingo dugu. Baserri bati ere emango diogu garrantzia. 
Gopegitik Manurgara joango gara. Bertan, herrian izan ziren dorretxeei buruz hitz egingo da. Jauregi bat ere, Hurtado de Mendozatarrena, ikusi ahal izango dugu. Elizara bidean baserri baten parean kondaira ezberdinak kontatu eta Verastegitarren jauregiaren parean bukatuko dugu herri honen bisitarekin. Markinan (Arabakoan) bertan izandako dorreei buruz hitz egingo da, bandoen arteko borrokan ere sakonduko dugu dorre horietan bizi izan ziren familiak aitzakiatzat hartuta.
Autobidea hartu eta Letonara joango gara azkenik. Egun zutik datorren dorre izugarriari buruz hitz egingo da. Baita elizako harriei buruz ere.
Bisita paseo txiki batekin amaituko da, Zaitegiko gazteluaren aurriak ikustera joango gara. Gaztelua nolakoa zen “ikusiko” dugu, eta Araban izan ziren gazteluak eta horien garrantziari buruz hitz eginez amaituko da txangoa.
Beti bezala sarrera hau honakoa gogoratu araziz amaitu behar dugu, bisitan izena emateko gutxienez 4 pertsonako taldeak behar dira eta prezioa taldeko partaide kopuruan araberakoa izango da. Bisita honek 3 ordu pasatxo irauten du, norbaitek motzagoa egin nahi izanez gero, bisitatu nahi dituen herriak aukeratu ditzake. Bisita norberak diseinatzerakoan Zuiako Koadrilako edozein bisita gidatutan bisitatzen diren herriekin egin daiteke puzzlea.
